Breiðdalssetur - Hvernig fara saman Sláturhús og ferðaþjónusta?

Eftir að hafa lesið frétt í Morgunblaðinu á blaðsíðu 2, laugardaginn 21. maí, 2011, veltir maður fyrir sér hvernig það fari saman í miðbæjarkjarna í litlu þorpi á landsbyggínnig að reka saman ferðaþjónustu og sláturhús á sama reitnum?

 Á Breiðdalsvík er búið að eyða talsverðu fé i að gera upp Gamla kaupfélagið og í því er verið að byggja upp Jarðfræðisetur sem opnað var árið 2008 til að heiðra minningu dr. George P.L. Walkers og þann 11. júní n.k. stendur til að opna minningarstofu um dr. Stefán Einarsson í þessu sama húsi. Húsið er einstaklega fallegt og vel hefur tekist að gera það upp svo húsið er í dag mikil bæjarprýði. Húsið stendur skammt ofan við gamalt sláturhús sem var aflagt árið 2003. Nú mun Landbúnaðarráðherra hins vegar vera búinn að létta kvöðum af úreldingu hússins þannig að þar gæti hafist slátrun í haust sbr Morgunblaðsfréttina hér að neðan. Með þessu má eiginlega segja að þarna séu lögð drög að því að leiða Breiðdalssetur til slátrunar í orðsins fyllstu merkingu og þar með verið að fórna þeirri vinnu og styrkjum sem lögð hafa verið til verkefnisins.

 " Landbúnaðarráðherra hefur ákveðið
að aflétta kvöðum sem þinglýstar
voru á sláturhúsið á Breiðdalsvík
þegar það var úrelt 2003. Eigendur
hússins hyggjast hefja þar slátrun á
ný. Þeim er ekki gert að endurgreiða
18 milljóna kr. styrk sem þeir fengu
úr ríkissjóði til úreldingarinnar. Öðrum
sláturleyfishöfum sem úreltu á
sama tíma stendur þetta til boða.
Gert var átak til að fækka sauðfjársláturhúsum
á árunum 2003 og
2004. Sláturleyfishafar voru í vandræðum
vegna samkeppni á kjötmarkaðnum
og sláturkostnaður þótti
of hár. Sumir áttu erfitt með að gera
upp við bændur og Byggðastofnun
varð að ábyrgjast afurðalán. Opinber
nefnd lagði til að sláturleyfishöfum
yrði boðið að úrelda sláturhús og að
til þess yrði varið 170 milljónum á árunum
2003 og 2004. Ríkisstjórnin
samþykkti það og fækkaði sláturhúsunum
allmikið.
Þinglýst var ótímabundinni kvöð á
sláturhúsin um að þau mætti ekki
nota til slátrunar.
Sláturfélag Austurlands hefur hug
á að hefja slátrun í sláturhúsinu á
Breiðdalsvík og óskaði eftir því við
sjávarútvegs- og landbúnaðarráðuneytið
að kvöðinni yrði aflétt. Það
samþykkti ráðuneytið í gær við lítinn
fögnuð samtaka sláturleyfishafa og
sauðfjárbænda.
Ólafur Friðriksson, skrifstofustjóri
í ráðuneytinu, segir að ráðherra
telji að markmið úreldingarinnar
hafi náðst og því hafi verið
ákveðið að fella samninginn úr gildi.
Jafnframt hafi öðrum eigendum
gömlu sláturhúsanna verið gefinn
kostur á að sækja um aflýsingu þessarar
kvaðar, til að gæta jafnræðis.
„Við teljum þetta arfavitlaust
ráðslag,“ segir Sigurður Jóhannesson,
formaður Landssamtaka
sláturleyfishafa. Hann
segir að með því að afhenda fyrri
eigendum sláturhúsin að nýju, án
þess að krefjast endurgreiðslu
á úreldingarstyrkjum
ásamt vöxtum,
sé verið að raska samkeppni
á kjötmarkaðnum.
Þá óttist sláturleyfishafar
að einnig verði gerðar
minni heilbrigðiskröfur í
þessum húsum."

Vonandi sjá menn að sér og hætta við að fórna hagsmunum í uppbyggingu fræðaseturs og ferðaþjónustu á Breiðdalsvík.

Athugasemdir

[Júlíus Valsson, 22.5.2011 kl. 15:59]

Andverðleikasamfélagið á það til að slátra góðum hugmyndum, jafnvel strax í fæðingu.

[Björgvin Guðmundsson, 22.5.2011 kl. 16:59]

Sæll Ómar!

Ég treysti mér ekki til þess að taka afstöðu í þessu máli.+

Bestu kveðjur

Björgvin

[Ómar Bjarki Smárason, 22.5.2011 kl. 21:52]

Þakka ykkur Júlíus og Björgvin. Það þarf að fara vel yfir þetta mál og sjá hvaða möguleikar eru í stöðunni. Það leynast tækifæri í öllu, jafnvel þó búið sé að króa menn úti í horni, þá er alltaf undakomuleið ef vel er að gáð..... og við finnum hana.....