Myntkörfulán - hver fann upp á þeim?

Það væri gaman að vita hver það var sem fann upp þessi svokölluðu myntkörfulán eða lán í erlendum gjaldeyri til íbúða- og bílakaupa. Eftir því sem mér skilst þá var aldrei nein erlend mynt að baki þessum lánum heldur var þetta bara einhver reiknisleg stærð sem er að setja fjölda einstaklinga á hausinn. Það þarf að setja lög sem breyta þessum lánum yfir í annan reiknisgrunn þannig að þeir sem bankarnir plötuðu út í slíkar lántökur verði ekki settir í gjaldþrot af völdum léglegrar bankaráðgjafar. Það hlýtur að vera auðvelt að laga þetta ekki síður en þær skuldbindingar sem sjávarútvegsfyrirtæki voru með í gjaldeyrismálum, sem þó voru gerðir í frjálsum samningum á milli þeirra og bankana.

Þeir stjórnmálaflokkar sem sitja við stjórn nú ættu að huga alvarlega að þessu ef þeir vilja ekki þurrkast út í næstu kosningum og það kemur að því að það verður kosið og varla fara þeir, sem stjórnvöld hafa sett á hausinn að óskekju, að kjósa yfir sig sömu hörmungarnar aftur. Innganga í ESB eða upptaka Evru breytir ekki skuldastöðu þeirra sem settir verða í þrot með þessum hætti.

Athugasemdir

[Haraldur Bjarnason, 5.1.2009 kl. 08:31]

Sæll frændi. Auðvitað hefur aldrei verið neitt á bak við þessi lán frekar en annað í útrásinni og bankakerfinu. menn voru bara að kaupa og selja einhverja pappíra til að hækka tölur á ímynduðum eignum. Raunvirði þeirra sést best í dag.

[Ómar Bjarki Smárason, 6.1.2009 kl. 22:45]

Sæll frændi og takk fyrir að lesa þetta! Það er ömurlegt að horfa upp á fólk sem var fjárhagslega og eignalega bara nokkuð vel stætt far í gjaldþrot yfir lélegri bankaráðgjöf. Ég ræddi við kunningja minn í Noregi í dag og hann taldi að þar í landi væri banki þar sem ráðgjafi bankans ráðleggur fólki að taka svona lán og að flutja peninga af öruggum reikningum yfir á óöruggari peningabréf ábyrgur, nema starfsmaður bankans komi fram sem sölumaður en ekki ráðgjafi. Þetta er e.t.v. vert að skoða hér?

[Andrés Skúlason, 6.1.2009 kl. 23:19]

Sælir piltar
Eftir á að hyggja voru þetta allt saman sölumenn þessir ráðgjafar, ég held þó að fæstir þeirra hafi vitað það sjálfir hvað þeir voru í raun að bulla.  Þetta er allt af sama meiði, greiningardeildir bankanna voru í raun aldrei annað en auglýsingastofur fyrir bankanna, þar sem þeir gerðu aldrei annað en að tala upp ágæti sinna banka og hagnað þeirra, sama á hverju gekk og það gerðu þeir sannarlega alveg þangað til blaðran sprakk.  Manni líður eins og hálfgerðu fífli að hafa átt í viðskiptum við þetta lið og hafa verið svo barnalegur að trúa því sem matreitt var ofan í mann.  En á móti spyr maður ef fólk á ekki að trúa þeim sem auglýsa sig fagmenn í greininni hverjum á þá að trúa.
Ég færi t.d. tæplega með bílinn minn til sálfræðings þó að gangverkið sé flókið.
Nei, ég held að allur almenningur verði nú bara að gera þær lágmarksskröfur til bæði fjármálastofnanna sem og landsstjórnarinnar hverju sinni að þar sé hverju sinni reynt að gæta að almanna heill í þessum efnum þannig að það sé ekki verið að gambla með íslensku þjóðina eins og þurrkaða þorskhausa í Namibíu.