Hvort er verra að stela framtíðinni frá heilli þjóð eða hnupla úr búðarkassa...?

Eitt af verkefnum Alþingis á haustþingi hlýtur að vera að setja lög sem gera það kleift að refsa þeim sem stolið hafa framtíð þeirra sem eru að vaxa úr grasi. Það hlýtur að þurfa að finna leið til þess að refsa þeim með viðeigandi hætti sem skömmtuðu sjálfum sér laun og arð út úr loftbólufyrirtækjum og sija svo á eignum og sjóðum sem þeir í raun stálu fram í tímann og almenningur og yngri kynslóðir sitja uppi með.

Það vefst ekki fyrir réttarríkinu að dæma þá sem hupla úr búðarkassa eða hafa með sér kjötlæri úr vreslun án þess að greiða fyrir, en auðvitað sá löggjafinn það ekki fyrir að hér gengist stétt manna upp í því að ræna þjóðina framtíðinni.

Það getur vel verið að löglærða menn og konur skorti þekkingu og hugmyndaflug til lagasetningar af þessu tagi, sem vissulega verður að vera afturvirk. Því gæti þurft að leita á náðir heimspekinga og siðfræðinga til að finna leiðir til að ná þeim verðmætum til baka sem af þjóðinni var rænt.

Þó það taki áratugi að ná þessum peningum og verðmætum aftur verður svo að vera en það er ekki líðandi að þjófar sitji á þýfi sínu til eilífðarnóns meðan aðrir heiðarlegri þjófélagsþegnar svelta.

Nú vill svo vel til að það er ein stofnun í heiminum að verða verkefnalaus, þ.e. sú stofnun sem tók það upp hjá sér að finna gömlu nasisana. Það er spurning um að óska eftir samstarfi við hana nú þegar síðustu stríðsglæpamennirnir eru fallnir í valinn. En fyrst þurfum við að koma upp nauðsynlegum lagaramma.

Treysti Alþingi sér ekki í þetta verkefni og nái það ekki að leysa úr þessu fyrir næsta vor er kannski athugandi að kjósa að nýju áður en verðmætin fara í súginn.

Athugasemdir

[Anna Sigríður Guðmundsdóttir, 4.9.2009 kl. 00:58]

Við getum víst kosið endalaust og botnlaust en hvað kemur út úr kosningunum? Hef stundum sagt bæði í gríni og alvöru, að þegar 300.000 íslendingar hafa verið kosnir til að stjórna á kosnað þrælanna í landinu og ekkert er að mati þessarra 300.000 nógu gott, ja hvað vill fólk þá gera? Og hver vill borga kosningarnar?

 Ég er spennt að heyra lausnina!

 Eigum við ekki heldur að hafa vit á að vinna saman að lausnum en að tapa öllu í sundrung? Annað hvort erum við þjóð eða þrælar svikara. Held frekar að við séum orðnir rótgrónir þrælar svikara stjórnvalda síðustu áratuga.

 En ég lifi eftir minni sannfæringu en ekki hagfræðinganna. þess vegna sé ég að það er von og ætla að berjast samkvæmt henni en ekki kjaftæði hagfræðinga heimsins. Ég fer mínar eigin leiðir með mitt brjóstvit, því heimurinn er víðtækari en hagfræðikenningar. því hafa þeir víst alveg gleymt. Ég treysti betur heimsspekingum.

[Ómar Bjarki Smárason, 4.9.2009 kl. 12:44]

Það þarf að stokka spilin upp á nýtt þegar færi gefst, Anna Sigríður, og losna við þá úr pólitík sem komu að því að koma þjóðinni í þá stöðu sem hún er í. Þetta tókst ekki í síðustu kosningum og því þarf að gera aðra tilraun þegar stornama lægir. Það er erfitt að sætta sig við að þeir sem tóku virkastan þátt í sukkinu og stýrðu fyrirtækjum sitji áfram eða setjist aftur við katlana, eins og ekkert hafi í skorist. Einnig er ekki lengur ásættanlegt að fulltrúar ættarvelda eða vafasamra klíka þiggi laun fyrir opinbera þjónustu. Stjórnmálaflokkarnir verða sjálfir að hafa vit á að losa sig við slíka óværu þegar næst verður kosið....

[Andrés Skúlason, 5.9.2009 kl. 22:43]

Það yrði gersamlega gangslaust fyrir þjóðina að kjósa upp á nýtt, ef þetta gengur ekki upp núna þá er ekkert um annað að ræða en byltingu og þá verður að taka stjórnkerfið allt í gegn og stokka allt upp á nýtt.
Ég er sem sagt að tala um algjöra hreinsun

[Ómar Bjarki Smárason, 7.9.2009 kl. 21:29]

Ég er eiginlega alveg sammála þér Andrés. Það þarf algera hreinsun og stokka upp á nýtt.