Nýtt tækifæri í vistvænni ferðaþjónustu í boði Vg auðvitað...

Við lestur pistils Kristins Péturssonar fæddist eftirfarandi hugmynd um ný tækifæri í ferðaþjónustu þar sem Hafró leyfir okkur ekki lengur að veiða þorsk og loðnan virðist hafa nánast yfirgefið okkur...

Þá gæti næsta skrefið verið að útbúa kafbáta fyrir ferðamenn og sigla með þá um Íslandsmið og skoða þorskinn og aðrar fisktegundir við Íslandsstrendur frekar en að vera að veiða þessi grey og drepa. Þá mætti einnig sjá hvernig selir og hvalir matast í náttúrulegu umhverfi og e.t.v. líka hvernig þorskurinn felur loðnutorfurnar fyrir Hafró....

Við gætum þróað þessa kafbáta þannig að þeir gengju fyrir vistvænu eldsneyti svo það kæmi nú eitthvað verulega vistvænt út úr svona verkefni. Og svo gætum við endurvakið skipasmíðaiðnaðinn með því að smíða þessi skip hér á landi. Í það verkefni fengjum við væntanlega styrki úr digrum sjóðum ESB.

Kannski að þetta gætu svo orðið skemmtiferðaskip framtíðarinnar. Hvaða vit er t.d. í því að sigla með ferðamenn um norðurslóðir og sýna þeim borgarísjaka þar sem einungis 10% af jakanum er sýniegur, þegar hægt er að skoða hin 90% neðansjávar úr kafbát? Það gæti líka orðið vinsælt að sigla með svona bátum og skoða Titanic og ýmis skipsflök og fjölbreytt lífríkið í kringum þau.

Nú er lag að koma svona verkefni á koppinn á meðan Vinstri grænir stjórna bæði sjárvarútvegs- og umhverfisráðuneyti....