Áhugaverð mismunun!

S.l. vetur greiddi ég fyrir hótelgistingu í tvær nætur á hóteli á Suðurlandi með íslensku greiðslukorti. Greiðslan var skráð sem símagreiðsla (í tveimur færslum reyndar) þó ég stæði fyrir framan þann sem ég greiddi. Síðan fékk ég reikninginn sendan á mitt fyrirtæki. Reikningurinn var í Evrum og virðisaukaskatturinn var líka í Evrum.

Mér þykir nokkuð ljóst á þessari frétt að þarna hafi ég brotið lög um gjaldeyrishöft. En hvað með þann sem ég skipti við. Er hann saklaus? Og ætli það sé mikið um það að greiðslur fyrir gistingu séu með þessum hætti í gegnum bókunarskrifstofur? Og hvar ætli greiðslurnar, sem þó fara í gegnum borgun, lendi. Fara þær inn á íslenska reikninga eða reikninga erlendis...?

Það væri áhugavert að aðrir segðu sínar reynslusögur af viðskiptum við íslensk fyrirtæki sem stunda sín viðskipti hér innanlands fyrir gjaldeyri.

Það má velta fyrir sér hverjum verið er að mismuna með því að Íslendingum er ekki leyft að stunda viðskipti við íslensk fyrirtæki í gjaldeyri. Það ætti alla vega að vera í góðu lagi á meðan gjaldeyririnn skilar sér inn í íslenskt hagkerfi. Ef hann hins vegar gerir það ekki þá myndi ég nú frekar vilja líta á það sem svo að það sé fyrirtækið sem þjónustuna selur sem sé að brjóta af sér en ekki saklaus Mörlandinn sem er að reyna að hámarka verðgildi launa sinna!

Þegar ég var í námi í Bretlandi á áttunda áratug síðustu aldar þá gátum við keypt far með Flugleiðum af breskum ferðaskrifstofum. Ferðunum fylgdi gisting í tjaldi í Laugardalnum, minnir mig. Flugleiðir girtu fljótlega fyrir möguleika okkar á því að kaupa þessi fargjöld sem voru miklu ódýrari. En maður hefði greinilega þurft að hanga lengur á gamla ACCESS kreditkortinu....!

Verðið breytist með markaðssvæðum

Athugasemdir

[Birgir Örn Guðjónsson, 8.11.2014 kl. 09:35]

Man líka að maður lét kaupa NY-Lux, báðar leiðir fyrir sig í USA hér áður.Miðinn var raunverulega NY-KEF báða leiðir og KEF-LUX báðar leiðir fyrir þann sem var á íslandi.

Þessi miði fékkst þá á spotprís miðað við að kaupa hér heima.

[Ómar Bjarki Smárason, 9.11.2014 kl. 01:00]

Verðlagning í flugi til og frá landinu hefur löngum verið með þeim hætti að þjóna erlendum viðskiptavinum Flugleiða/Icelandair á kostnað okkar Íslendinga. Og það er öllum brögðum beitt til þess að við getum síður ferðast ódýrt. Auðvitað hefur þetta eitthvað breyst með tilkomu lággjaldaflugfélaga, en yfirleitt endast þau ekki lengi því það þola fáir tapresktur til lengdar.