Íslandsheimsókn Ian Gibsons 15. - 27. ágúst 2009

Ian Gibson, sem var doktorsnemi George Walkers númer tvö hefur verið í heimsókn á Breiðdalssetri á Breiðdalsvík frá 15. ágúst og fer af landi brott fimmtudaginn 27. ágúst.

Ian hefur verið að skoða samsett hraun og samsetta ganga ásamt því að skoða nokkur af sambræddu túfflögunum á Austurlandi. Hann er í dag í Breiðdal að leita að opnum í Skesstúffið ásamt Þorvaldi Þórðarsyni og stúdentum frá háskólanum í Edinborg.

Ian mun vonandi koma hér aftur næsta sumar og þá fyrirhugum við að vera með námstefnu um vinnu Walkers á Austurlandi. Við vonumst til að fá innlenda og erlenda þátttakendur til náms og rannsóknarstarfa á Austurlandi. Hér er af nógu að taka í jarðfræðinni og áhugavert að byggja ofan á þann grunn sem dr. Walker lagði með korlagningu sinni á jarðfræðí Austurlands.

Í ár eru 50 ár síðan Ian Gibson kom fyrst hingað til lands, þá tvítugur að aldri. Hann var hér við rannsóknir ásamt dr. Walker á árunum 1959 - 1962. Hann vann við rannsóknir í Bandaríkjunum, var lektor í Addis Ababa í Eþíópíu og síðan við Bedford College í London. Þaðan lá leiðin til Kanada en þaðan fluttist hann árið 1995 og býr nú í Dunedin á suðureyju Nýja Sjálands.

Ítarlegt viðtal mun við Ian Gibson mun birtast í Austurglugganum fimmtudaginn 3. september 2009.

Skrár tengdar þessari bloggfærslu:

• gibson_walker_composites_pga.pdf
• blake_et_al_1964_qjgs.pdf

Athugasemdir

[Ómar Bjarki Smárason, 25.8.2009 kl. 23:24]

Þakka það Kristinn. Það verður vonandi hægt að rífa þetta eitthvað upp á næstu árum, en góðir hlutir gerast hægt og vinnast með þolinmæðinni.....

Vertu velkominn í Breiðdalssetur! Þú bankar bara á hreppsskrifstofunni ef ekki er opið...

[Unnur Brá Konráðsdóttir, 26.8.2009 kl. 13:05]

Skemmtilegt að fá að fylgjast með hvað þið eruð að bardúsa þarna fyrir austan. Er ekki spurningin hvenær en ekki hvort jarðfræðingurinn komi að svipuðum verkefnum á æskuslóðunum?

[Ómar Bjarki Smárason, 27.8.2009 kl. 00:28]

Þakka áhugann Unnur Brá. Vandinn er bara sá að ég er svo illa að mér í láglendisjarðfræði æskuslóðanna, öskulögum og slíku.....