Sóðaskapur í Miðborginni.....

Skrapp í morgun í Bernhöftsbakarí, sem er elsta brauð- og kökugerð landsins, að sækja rúnstykki með morgunkaffinu. Bakaríið hefur verið samfellt starfandi í heil 175 ár og býður upp á rúnstykki á 50 kr stykkið alla daga vikunnar.

Á leiðinni niður Skólavörðustíg og Laugaveg blasti við heldur ófögur sjón eftir þá sem stunda öldurhús og svall langt fram á nætur. Það voru brotnar flöskur, pappadiskar og pizzukassar á víð og dreif um allt. Svona er þetta flesta sunnudagsmorgna og mikið verk fyrir hreinsunarfyrirtæki að hreinsa og þrífa. Þeir sem eru að selja út mat og drykkjarföng út á götuna ættu nú að sjá sóma sinn í því að koma fyrir ílátum fyrir rusl, eða kannski að borgin ætti að sjá um þann þáttinn. Göturnar gegna hlutverki ruslatunnunar heldur illa.

Í vor eru kosningar og kannski að flokkarnir gætu endurvakið hugtakið "hrein borg - fögur borg".....