Viðkoma á nokkrum höfnum

Þetta geta nú tæplega kallast "strandsiglingar" þó komið sé við á nokkrum höfnum á leið til Evrópu. Eiginlegar strandsiglingar felast í því að siglt sé í reglulegri áætlun á hringinn í kringum landið, helst í báðar áttir eins og gert var í kringum 1970. Þannig geta sjóflutningar leyst landflutninga á þungavöru af að einhverju leyti og þar með létt þungaumferð af vanbyggðum vegum.

Vonandi verður þess ekki langt að bíða að strandsiglingar hefjist þar sem farþegar verða fluttir einnig, líkt og tíðkast norður með vesturströnd Noregs (Svíþjóð hindrar víst siglingar með austurströndinni). Þarna gætu skapast ný tækifæri í ferðaþjónustu auk vöruflutninga.

Eimskip hefur strandsiglingar í dag

Hættum að lesa...

Við hljótum að svara þessu með því að hætta að lesa bækur Jeffrey Archers!

Versta fríið var á Íslandi

Til hamingju með álitlegt jarðhitasvæði RARIK!

Það gildir um jarðhitaleitina eins og svo margt annað að það fer betur á því að menn fái aðra til hrósa sér fyrir vel unnið verk. Það hefur lengi legið fyrir að við Hoffell er talsvert af vatni og full ástæða er að óska RARIK til hamingju með álitlegt jarðhitasvæði. Árangurinn af boruninni er hins vegar rýrri en efni stóðu til þar sem holan hefur greinilega enn ekki hitt á uppstreymissprungu jarðhitakerfisins. Ástæðan fyrir því er í fyrsta lagi sú að holan var staðsett of langt frá "jarðhitasprungunni" og í öðru lagi sú að holan hefur væntanlega sveigt á móti jarðlagahallanum og í átt frá sprungunni. Það er frumskilyrði í borun vinnsluholu af þessari stærð að hægt sé að stjórna stefnu borkrónunnar, þannig að holan sé annað hvort boruð lóðrétt og víki ekki nema um 1° frá lóðréttri stefnu eða þá að hún stefnuboruð með þar til gerðum búnaði í fyrirfram ákveðna stefnu.

Fullyrðing Ísor um að það jarðlagalíkan sem unnið hafði verið eftir fyrir aðkomu þeirra að verkinu hafi ekki verið rétt er mjög vafasöm, svo ekki sé meira sagt. Þeir hafa ekki enn sýnt fram á að það líkan sem þeir gerðu eftir ítarlegar holusjármælingar sér neitt betra. Alla vega virðist holan ekki hafa tekið vatn frá þeirri sprungu sem nýtt hefur verið til upphitunar húsa í Miðfelli og gefið hefur um 58°C heitt vatn af 470 m dýpi!

Það verður fróðlegt að fylgjast með prófunum á þessari holu og svo framhaldi vinnsluborana á svæðinu. Vonandi verða þeir hjá RARIK ofurlítið heppnari í borun næstu holna því æskilegt er að ná um 80°C vatni til að leiða þá 18 km leið sem hitaveitulögnin þarf að fara að bæjarmörkunum á Höfn. Sá vatnshiti næst tæplega í jaðri jarðhitasvæðisins og því æskilegra að staðsetja næstu holu nær miðju þess eins og áformað hafði verið áður en Ísor kom að þessu verki s.l. vor.

Góður árangur eftir 20 ára leit

Betri markvarsla....

Kannski voru það einu mistök þjálfarans að taka ekki Heiðar Leví með í þetta mót. Reynsla hans hefði hugsanlega nýst í fyrsta leiknum á mótir Rússum. Á móti kemur þó að Aron hefði þá ekki öðlast reynslu, en spurning er hvort markverðir þurfa ekki að taka hana út í félagsliðum frekar en með landsliðinu? Bjöggi og Heiðar Leví hafa unnið vel saman á stórmótum og peppa hvorn annan upp.

Svo átti auðvitað að nota Ólaf Gústafsson meira en gert var. Þá hefði væntanlega líka náðst meira út úr hægri vængnum fleiri komið að því hlutverki að leysa úr vandanum sem fylgir því að Ólafur Stef og Alexander vantaði að þessu sinni...... og þá hefðum við kannski unnið Frakkana líka.....!

Ísland hefði farið í undanúrslit

Finnum hana fyrst og vinnum hana svo...

Það er nú óráðlegt að við förum fram úr okkur í þessu máli líkt og flestum öðrum því fyrst verðum við nú að finna olíuna í vinnanlegum magni áður en hægt verður að tala um það í einhverri alvöru að vinna hana.

Tökum eitt skref í einu og öndum djúpt á milli.....

80% styðja olíuvinnslu á Drekasvæðinu

Óþarfi fyrir "strákana okkar" að leggjast í þunglyndi

Það er nú ekki eins og himinn og jörð séu að farast þó við töpum fyrir stórgóðu liði Rússa, sem hafa úr mun stærri hóp að velja en við. Þeir eru búnir að fara í gegnum þann öldudal sem gætum þurft að ganga í gegnum núna, því það eru einfaldlega of mikil afföll í liðinu til að hægt sé að ætlast til kraftaverka af því í hverjum.

 Þið eruð að byggja upp nýtt lið, strákar. Reynið því að spila þann létta og skemmtilega handbolta sem þið kunnið best og þar sem flestir fá að spila sem mest. Takið einn leik í einu og horfið til framtíðar.

 Og endilega látið Þóri um vítaköstin!

Aron: Ég biðst afsökunar

Heppnir að Messi valdi ekki handboltann....

Við megum þakka fyrir að Messi valdi fótboltann fram yfir handboltann. Annars hefðum við væntanlega mátt eiga von á erfiðari leik við Argentínumenn.... en kannski kalla þeir hann inn í liðið þegar líða tekur á keppnina, ef við sækjum Ingimund....?

Messi hitti handboltalandsliðið

Áhugaverður árangur af jarðhitaleit

Það er áhugavert að vatn frá Vatnafjöllum og Heklusvæðinu skuli skila sér í Fljótshlíðina. Séu fjöll Fljótshlíðarinnar sem teygja sig til vestur frá Tinfjöllum í átt að Hvolsvelli, svo lek að kalt vatn frá svæðinu norðan þeirra leki þar í gegn, þá er varla að vænta hás hitastiguls eða jarðhita í Fljótshlíð.

En mikil verðmæti felast í kalda vatninu til lengri tíma litið og áríðandi að verðmætustu lindir og vatnsöflunarsvæði séu vernduð tryggilega. En hvort mestu verðmætin felist í vatnstöku úr borholum á einhverju verðmætasta landbúnaðarhéraði landsins skal ósagt látið, því þar er óhjákvæmilega nokkur hætta á mengun frá áburði og frárennsli. 

 Í tillögu að vatnsverndarskipulagi sem unnið var fyrir Hvolhrepp árið 1998 var gerð tillaga að verndun vatnstökusvæða í Krappa og svæðinu þar austur af á milli Eystri Rangár og Fiskár. Þar er gengur fram sterkur grunnvatnsstraumur með gnótt af fersku ómenguðu vatni.

En varðandi leka á köldu grunnvatni frá Vatnafjöllum niður í Fljótshlíð, þá hlýtur þarna að hafa orðið einhver misskilningur á milli blaðamanns og jarðfræðings.

Mikið og kalt neysluvatn fannst í Fljótshlíð

Af kögunarhóli Þorsteins Pálssonar 5. janúar 2013 - Flottur pistill

Vek athygli á þessum einstaklega góða og málefnalega pistli Þorsteins Pálssonar í Fréttablaðinu í dag, laugardaginn 5. janúar 2013.

"AF KÖGUNARHÓLI ÞORSTEINS PÁLSSONAR
Hvöss en hófsöm hirting
Það bar ekki við um þessi áramót að forystumenn stjórnmálaflokkanna sendu frá sér boðskap sem líklegur er til að brjóta upp lokaða pólitíska stöðu. Vandinn er ekki skortur á hugmyndum; fremur hitt að ekki verður séð að unnt sé að binda þær saman með breiðri málamiðlun og af nægjanlegum styrk.
Í nýársávarpinu setti forseti Íslands á hinn bóginn stórt strik í reikninginn til að breyta rás stjórnarskrármálsins og gera kröfur um ríkari samstöðu. Það var tilraun til að hefja málið úr átakafarvegi eða leiða það úr blindgötu og knýja forsætisráðherra til
að sýna þessu mikla viðfangsefni málefnalega virðingu.
Við venjulegar aðstæður er það ekki hlutverk þjóðhöfðingjans að blanda sér í viðfangsefni Alþingis á þennan veg. Alla jafna væri það tilefni harðrar gagnrýni. Segja má að stjórnarskrárendurskoðun sé helsta málefnið sem réttlætt getur slíkt inngrip af hans hálfu og þó því aðeins að í mikið óefni stefni.
Að öllu virtu verður að fallast á það stöðumat með forsetanum að rétt hafi verið að taka í taumana í ljósi þess hvernig forsætisráðherra og stjórnskipunar- og eftirlitsnefnd Alþingis hafa haldið á málinu eftir að stjórnlagaráð skilaði tillögum sínum fyrir einu og hálfu ári. Jafnvel má líta svo á að forsetanum hafi verið þetta skylt eins og málið er vaxið. Hirting forsetans var sannarlega óvenjuleg og hvöss en um leið hófsöm og studd málefnalegum athugasemdum.

Tímamót í ríkisráðinu
Skoða þarf íhlutun forsetans í því ljósi að ýmsir hafa áður talað á sama veg og gefið
svipuð ráð um vandaðri málsmeðferð á Alþingi. Þá hafa allir helstu sérfræðingar í stjórnskipunarrétti og stjórnmálafræðum við háskólana sett fram fræðileg sjónarmið
um margvísleg álitaefni sem ekki hafa verið nægjanlega skoðuð, jafnframt því að leggja á ráðin um agaðri og málefnalegri vinnubrögð.
Í lýðræðisþjóðfélagi er ekki unnt að skella skollaeyrum við slíkum athugasemdum. Forsetinn blandaði sér ekki í málið fyrr en fullreynt var að forsætisráðherra ætlaði
ekki að hlusta. Sjálfur reifaði forsetinn ýmis álitaefni varðandi stjórnarskrána við þingsetningu haustið 2011. Viðvörunarljósin hafa því logað lengi. Aftur á móti hefur
forsætisráðherra ekki svarað einni einustu athugasemd efnislega. Talsmenn hans hafa hins vegar ekki sparað háskólasamfélaginu háðsglósurnar.
Forsetinn gerði grein fyrir íhlutun sinni á fundi ríkisráðs daginn fyrir nýársávarpið. Hún
var því formbundin stjórnskipuleg athöfn en ekki orðagjálfur í ræðu. Ríkisráðið er réttur vettvangur fyrir forsetann til athafna sem þessara. Það lýsir stjórnskipulegu
mikilvægi málsins að leita þarf í skjalasöfnum að fordæmi fyrir því að forseti hafi
gripið til þessa ráðs í ríkisráðinu.
Forsetinn taldi sig hafa hvort tveggja gild rök og pólitískt afl til að taka stærsta mál ríkisstjórnarinnar fyrir á þessum vettvangi í því augnamiði að breyta framgangi
þess og hvetja til breiðari samstöðu um efni þess. Það er stórt skref og markar stjórnskipulega nokkur tímamót. Rétt er að gera þá kröfu til forsætisráðherra
að hann bregðist við íhlutun forsetans með málefnalegum sjónarmiðum í ríkisráðinu.
Síðan ber honum að gera Alþingi og þjóðinni grein fyrir þeim. Furðu sætir að ekki skuli þegar hafa verið boðað til nýs ríkisráðsfundar í þeim tilgangi.

Til hvers ríkisráð?
Forsetinn greindi þau álitaefni sem þarfnast frekari skoðunar nokkuð ítarlega. Það eru ekki síst atriði sem lúta að stjórnskipulaginu sjálfu og þeim leikreglum sem gilda eiga
í óhjákvæmilegu samspili löggjafarvaldsins og framkvæmdavaldsins.
Hver einstök grein í stjórnarskrá kallar á jafn mikla rannsókn og jafn ítarlegar umræður eins og heill lagabálkur í almennri löggjöf. Forsetinn hefur einfaldlega bent á að þessi vinna er að stórum hluta eftir.
Athugasemdir forsetans við þá hugmynd að leggja ríkisráðið niður er athyglisverð í ljósi þess að hann hafði engan annan stjórnskipulegan vettvang til að grípa inn í þetta mál. Þó að slíkar athafnir forseta eigi að takmarkast við yfirvofandi stjórnskipuleg
stórslys má af þessu ráða að hyggilegt getur verið að viðhalda þessari stofnun æðstu handhafa framkvæmdavaldsins.
Reynslan sýnir líka að í tíð fjögurra síðustu ríkisstjórna hafa ráðherrar stöku sinnum haft ærnar ástæður, jafnvel skyldu, til að nota þennan vettvang til að kippa forsetanum niður á jörðina. Af einhverjum ástæðum hafa þeir þó látið það vera. En málið er að hvorki forsetinn né ráðherrarnir mega hanga í stjórnskipulega lausu lofti við slíkar aðstæður telji þeir athafna þörf."

Blindingjaleikur með 10 milljarða

Það er einkar athyglisvert ef fjármálastofnanir voru að lána 10 milljarða án þess að vita hverjum lánið var ætlað eða til hvers átti að nota þessa "skiptimynt"....!

Í hvaða heimi lifðu þeir sem tóku þátt í þessum gjörningi?

Á huldu hver lánaði Milestone